ဘာသာတရားတန်ဖိုးထားစေချင်

"ဘာသာတရား တန်ဖိုးထားစေချင်"

စာရေးသူသည် ဤဆောင်းပါးရေးရခြင်း၏ ရည်ရွယ်ချက်သည် ဗုဒ္ဓဘာသာမြန်မာလူငယ်များအနေဖြင့် ပညာရေး၊ စီးပွားရေး၊ လူမှုရေးရည်မှန်းချက်များအောင်မြင်မှုအပြင် ဗုဒ္ဓဘာသာရေး၊ မြန်မာ့ယဉ်ကျေးမှုအရေးတို့ကို တွဲဖက်လုပ်ဆောင်ပါ လောကီ၊ လောကုတ္တရာနယ်ပယ်တွင်နယ်တွင် ယခုဘဝတွင်သာမက နောင်သံရာကောင်းဖို့အတွက်ထိပါ ရည်ရွယ်ခြင်းဖြစ်သည်။
ဗုဒ္ဓဘာသာ မြန်မာလူငယ်များ၏ ဘာသာတရားအပေါ်ထား ရှိသောလေးနက်မှုသည် မိရိုးဖလာဗုဒ္ဓဘာသာနှင့် တကယ်ဗုဒ္ဓဘာသာ၏ အခြေခံသဘောတရားတို့ကို မသိနားမလည်ကြပေ။ ဗုဒ္ဓဘာသာသည် မေတ္တာတရား၊ ကိုယ်ချင်းစာတရား တို့ကို မခြေခံအလေးထား၍ သူတပါးတို့အားမထိခိုက်မနစ်နာစေဘဲ၊ အပြစ်ကင်းအောင်ပြုမူပြောဆိုခြင်းပင်ဖြစ်သည်။
ကျွန်မတို့ငယ်စဉ်တုန်းကဆိုလျှင် မိဘ၊ ဘိုးဘွား၊ ဦးဦး၊ ဒေါ်ဒေါ်များထံ၌ဖြစ်စေ၊ ကျောင်းတွင်ဖြစ်စေ မူလတန်းကျောင်းသူ၊ ကျောင်းသားဘဝကပင် ၃၈ဖြာမင်္ဂလာ၊ ဗုဒ္ဓဘာသာသင်တန်း၊ မိဘကျင့်ဝတ်၊ သားသမီးကျင့်ဝတ်၊ တပည့်ကျင့်ဝတ်၊ ဆရာကျင့်ဝတ် စသည့်ကျင့်ဝတ်တရားကောင်းများကိုလည်းကောင်း ကြီးပွားချမ်းသာကြောင်းဖြစ်သော မင်္ဂလာတရားတော်များကိုလည်းကောင်းသင်ကြားခဲ့ရပါသည်။ လူကြီးမိဘ၊ သူစိမ်းတရံဖြစ်စေကာမူ အသက်အရွယ်ကိုလိုက်၍ ညီမလေး၊ မောင်လေး၊ ညီလေး၊ အစ်ကို၊ အစ်မ၊ ဦးဦး၊ ဒေါ်ဒေါ်၊ ဘကြီး၊ မေကြီး၊ ဘိုးဘိုး၊ ဘွားဘွားစသည်ဖြင့် မေတ္တာရှေ့ထား၍ ဆွေမျိုးစပ်ခေါ်ဝေါ်ပြောဆိုခြင်းသည်လည်းကောင်း၊ လူကြီးများအားဂါဝါရရှေ့ထား၍မာန်မာနနှိမ့်ချကာ ကျွန်တော်၊ ကျွန်မဟုသုံးနှုန်းပြောဆိုခြင်းသည်လည်ကောင်း၊ အခက်အခဲ၊ အကျပ်အတည်းနှင့် ကြုံဆုံနေရသူဆိုလျှင်လည်း ကိုယ်ချင်းစာတရား၊ စေတနာရှေ့ထားပြီးကူညီဆောင်ရွက်ပေးသည်မှာ ကျွန်မတို့မြန်မာဗုဒ္ဓဘာသာတရား၏ ယဉ်ကျေးမှုအနှစ်သာရဖြစ်ပါသည်။
ယနေ့မျက်မှောက်ခေတ် လူငယ်လူရွယ်လေးများမှာ ကျွန်မတို့ငယ်စဉ်ကကဲ့သို့ ယဉ်ကျေးလိမ္မာတရားများနှင့်ဝေးနေသည်ကို တွေ့ရပါသည်။ကျောင်းတွင်မသင်ရသလို အိမ်ရှိမိဘများကလည်း စားဝတ်နေရေးအတွက် စီးပွားရှာ ရုန်းကန်လှုပ်ရှားနေရသည့်အတွက် သားသမီးများအပေါ် ဘာသာရေး၊ လူမှုရေး၊ မြန်မာ့ယဉ်ကျေးမှု အခြေခံအနှစ်သာရများကို အသိအမြင်ကျယ်အောင် လမ်းညွှန်သင်ကြား ပြသမပေးနိုင်ရှာတော့ပေ။
ယနေ့ခေတ် ဗုဒ္ဓဘာသာဝင်လူငယ်အများစုသည် မိမိတို့ကိုးကွယ်ဆည်းကပ်သည့် ကျောင်းကန်ဘုရားများသွားခေါ်လျှင် မလိုက်ချင်ကြပေ။ စေတီပုထိုးများသို့သွားလျှင်လည်း တကယ့်ဘုရားကို ကြည်ညိုဖူးမြော်ချင်လိုသွားသည်က နည်းပါးလေသည်။ ဘုရား ကျောင်းကန်သွားဖို့ခေါ်လျှင်လည်း မလိုက်ချင်ကြပေ။ တခြားဘာသာဝင် ကလေးငယ်များကမူ သူတို့သက်ဆိုင်ရာ ဘာသာရေး ကျောင်းများသို့ သွားရလျှင်ပင်ပျော်ရွှင်နေကြသည်မှာ စာရေးသူ မျက်မြင်ကိုယ်တွေ့ ဖြစ်ပါသည်။
ထိုသို့ခြားနားခြင်းသည် အဘယ့်ကြောင့်နည်းဟု သုံးသပ်လေ့လာဖို့ လိုအပ်နေသည်မှာ အမှန်ပင်ဖြစ်သည်။ တာဝန်ရှိသော မိဘများအနေနှင့်လည်း ဘုရားကျောင်းကန်သို့သွားသည့်အခါ လူငယ်လေးများကိုဘုရားကျောင်းကန်သို့ ခေါ်ဆောင်သွားရန် တိုက်တွန်းအပ်ပါသည်။ မိမိတို့ကလေးငယ်များအား "ကလေးက ကလေးလိုနေ၊ လူကြီးနေရာ ဝင်မရှုပ်ရဘူး" ဟုမပြောသင့်၊ ဘုရားကျောင်းကန်သို့သွားသည့်အခါ ဦးဆောင်၍ခေါ်ဆောင်သွားသင့်ပါသည်။
စာရေးသူတို့ ပတ်ဝန်းကျင်တွင် ကြုံတွေ့နေရသည်မှာ ယနေ့ခေတ်လူငယ်လေးများသည် မြန်မာ့ယဉ်ကျေးမှု ဘာသာရေးအားနည်းလာသည့်အလျောက် ရိုသေထိုက်သူကို ရိုသေရကောင်းမှန်းမသိတော့။ လူကြီးမိဘများပြောဆိုဆုံးမလာသည့်အခါတွင် ပြောစကားနားမထောင်တော့။ မရိုမသေ ပြန်လည်ပြောဆိုလာပြီး `ကိုယ်ထင်ရာ ကိုယ်ဆိုင်း´ နေထိုင်ပြောဆိုနေကြသည်ကို တွေ့နေရပါသည်။
ယနေ့ခေတ်လူငယ်လေးများမှာ ဘုရားကျောင်းကန်များတွင်ပင်ပန်းခြံအမှတ်နှင့် အတွဲကိုယ်စီကိုယ်စီဖြင့် ယိုသူမရှက် မြင်သူရှက်လောက်သည်အထိ နေထိုင်နေမှုမျိုးကို တွေ့နေရသည်မှာ မြန်မာလူမျိုးတစ်ယောက်အနေနှင့် အလွန်ဝမ်းနည်းဖို့ ကောင်းလှပါသည်။ ကိုယ့်နိုင်ငံ၊ ကိုယ့်လူမျိုး၊ ကို့ယ့်ဘာသာကို မိမိတို့မှ မထိန်းသိမ်းမစောင့်ရှောက်လျှင် မည်သူတွေက စောင့်ရှောက်တော့မှာလဲရှင်။ မည်သို့မျှ မသင့်လျော်ပေ။
အကယ်၍ အမှန်တကယ်ပင် မထိန်းနိုင် မသိမ်းနိုင်ဖြစ်ပါမူပန်းခြံများ၊ ကစားကွင်းမျာ၊ ဥယျာဉ်များသို့သာ သွားကြဖို့သင့်ပေသည်။ ကျောင်းကန် ဘုရားဝင်များသည် တရားဓမ္မနှင့် မွေ့လျော်လိုသူများအတွက်သာ ခိုနားစရာ အေးရိပ်ဖြစ်ပါသည်။ ယင်းတရားဓမ္မ မွေ့လျော်၍ဘုရားလာကြသော ရဟန်းသံဃာ၊ လူကြီး၊ လူငယ်၊ အများပြည်သူတိုအတွက် စိတ်အနှောင့်အယှက်ဖြစ်ရသကဲ့သို့ ကာယကံရှင် သမီးရည်းစားစုံတွဲများတွင်လည်း အပြစ်အလွန်ကြီးမားလှသည်။
ယနေ့ခေတ်လူငယ်များသည် ဘွဲ့ဒီဂရီများ၊ ပညာမာနများ၊ ဓနမာနများဖြင့် လောကကြီးအားဂရုမစိုက်မော်ကြွားလျက် မာနတံခွန်လွှင်ထူထားကြပါသည်။ တကယ်တော့ ရရှိထားသည့်ဘွဲ့လက်မှတ်များမှာ စားဝတ်နေရေးနှင့် လူမှုအဆင့်အတန်းမြင့်မားအောင်ထောက်ပံ့ပေးသည်မှန်သော်လည်း ကိုယ်လူမျိုး၊ ကိုယ်လူမျိုး၊ ကိုယ်ဘာသာ၊ ကိုယ့်ယဉ်ကျေးမှုကို အလေးအမြတ်ထားမှသာ လောကကြီးကို အလှဆင်နိုင်ပြီး လူရည်ချွန်၊ လူရည်မွန်ကောင်းလေးတွေဖြစ်လာမှာ အမှန်ပင်ဖြစ်ပါသည်။
ယနေ့ခေတ် လူငယ်လေးများသည် အနာဂတ်၏ခေါင်းဆောင်ကောင်းဖြစ်လာမည့် ကြယ်ပွင့်လေးများဖြစ်သည့်အတွက် သားကောင်း၊ သမီးကောင်းရတနာဖြစ်ဖို့ ကျောင်းသူ၊ ကျောင်းသားဘဝကပင်စပြီး အသိပညာ၊ အတတ်ပညာအပြင် ပဉ္စသီလခေါ်ကျင့်ဝတ်ငါးပါး၊ ကိုယ်အမူအရာ၊ နူတ်အမူအရာတို့ကို အပြစ်ဆိုဖွယ်မရှိအောင်မိဘ၊ ဆရာများ ပူးပေါင်း၍ ဝိုင်းဝန်းထိန်းသိမ်းကြပါရန် စေတနာရှေ့ထား၍ တိုက်တွန်းအပ်ပါသည်။
လူငယ်များအနေဖြင့်လည်း ခေတ်ရေစီးကြောင်းမျောပါလာသည်နှင်အမျှ ကိုယ်လူမျိုး၊ ကိုယိဘာသာ၊ ကိုယ်ယဉ်ကျေးမှု၊ လူမှုဆက်ဆံရေးများကို မြတ်ဗုဒ္ဓ၏ မင်္ဂလာတရားတော်နှင့်အညီ တစ်ဖက်တစ်လမ်းမှ ထိန်းသိမ်းကာကွယ်ခြင်း၊ မြတ်စွာဘုရား၏ တရားတော်များ၊ ဗုဒ္ဓဘာသာနှင့် မြန်မာ့ယဉ်ကျေးမှုကိုတန်ဖိုးထားလေ့လာခြင်းများ ပြုလုပ်ဖို့လိုပါသည်။ အမျိုးဘာသာ၊ သာသနာတော်ကို ချစ်မြတ်နိုး၊တန်ဖိုးထားတတ်လျှင်ဖြင့်တန်ဖိုးရှိသော သားကောင်းရတနာ၊ သမီးကောင်းရတနာဖြစ်လာမည်မှာ အမှန်ပင်ဖြစ်ပါသည်။ မြန်မာလူငယ်များ၏ ဘာသာရေးအပေါ်ထားရှိသောခံယူချက်မှာ (၂)မျိုးကွဲပြားနေသည်ကို တွေ့ရပါသည်။

(၁)မိရိုးဖလာဗုဒ္ဓဘာသာနှင့်
(၂)တကယ့်ဗုဒ္ဓဘာသာစစ်စစ်ဟု ကွဲပြားနေခြင်းဖြစ်ပါသည်။
မိရိုးဖလာဗုဒ္ဓဘာသာဟူသည် မိဘမျိုးရိုးစဉ်အဆက် ဗုဒ္ဓဘာသာအလိုက်ကိုးကွယ်ခြင်းဖြစ်၍ ဗုဒ္ဓဘာသာအပေါ် ခံစားချက်၊ ခံယူချက်၊ လေ့လာသင်ယူချက်နည်းပါးပါသည်။ မိဘ၊ ဘိုးဘွားများက ဗုဒ္ဓဘာသာကိုးကွယ်၍သာ လိုက်၍ကိုးကွယ်ရုံသာဖြစ်သည်။ မိရိုးဖလာဗုဒ္ဓဘာသာကိုးကွယ်မှုသည် ယနေ့ခေတ်မြန်မာလူငယ် ယောက်ျားလေး၊ မိန်းကလေးများအတွက် ဘာသာရေးဘက်တွင် အလွန်အန္တရာယ်ရှိပါသည်ဟု စာရေးသူအနေဖြင့်ပြေပြချင်ပါသည်။
ယနေ့ခေတ်အချိန်အခါမျိုးတွင် တိုင်းတပါးယဉ်ကျေးမှု၊ တိုင်းတပါးက အနုပညာများကထိုးပေါက်ဝင်ရောက်လာသည့်အတွက် ခေတ်လူငယ်များအနေဖြင့် မိမိတို့အမျိုးဘာသာ၊ သာသနာနှင့် မြန်မာ့ယဉ်ကျေးမှုကို တန်ဖိုးထားမြတ်နိုးထိန်းသိမ်းရန်လေ့လာဆည်းပူးသင့်ပါသည်။ မိမိတို့ကိုယ်ပိုင်ယဉ်ကျေးမှုဖြစ်သော ဗုဒ္ဓသာသနာကိုထိန်းသိမ်းရကောင်းမှန်းမသိဘဲ ဖြစ်နေကြသောအခါ၊ တိုင်းတပါးယဉ်ကျေးမှု များအား အထင်ကြီးအတုခိုးလျက် လူငယ်များအနေဖြင့် မကောင်းသည်ကို မကောင်းမှန်းမသိ၊ ရှက်သင့်သည့်အရာကို ရှက်ရကောင်းမှန်းမသိကြတော့ပေ။
မြန်မာ့ယဉ်ကျေးမှု အမျိုးဘာသာ၊ ကိုးကွယ်ရာဗုဒ္ဓဘာသာကို မြတ်နိုးရကောင်းမှန်းမသိပဲ ဘာသာရေးအားနည်းလာသောအခါ အမျိုးသားရေး၊ စိတ်ဓာတ်အခြေမခိုင်ယိုင်နဲ့ လာကြပေသည်။ ယနေ့ခေတ်သည် IT ခေတ်လိုပဲပြောပြော တိုးတက်နေသော ကမ္ဘာကြီးဟုဆိုဆို မြန်မာ့ယဉ်ကျေးအမွေအနှစ်၏ ကြီးမြတ်မှု့ကိုတော့ဖြင့် မမေ့သင့်ပါလေ။ အတုယူသင့်သည့် ပညာရပ်ဆိုင်ရာများကိုအတုမယူဘဲ ရလာဒ်ဆိုးတို့၏ ဝါးမျိုးခြင်းကိုခံရသည်တော့ အမှန်ပင်ဖြစ်ပါသည်။
ယနေ့ခေတ် အနာဂတ်လူငယ်များ၏လှုပ်ရှားမှုမှန်မျှသည် အနာဂတ်မြန်မာ့လူဘောင်၏ ကောင်းကျိုး၊ ဆိုးကျိုးမှန်သမျှကို ဖန်တီးသွားမည့်အကြောင်းအရာဖြစ်သည့်အတွက် ဗုဒ္ဓဘာသာမြန်မာလူငယ်များအနေဖြင့် မသိနားမလည်သည်များကို တကယ့်ဗုဒ္ဓဘာသာဖြစ်ဖို့ လေ့လာသင်ယူခြင်းများ ပြုလုပ်သင့်ပါတယ်။
နှစ်ဆယ်ရာစုခေတ်အမျိုးသားကောင်း၊ အမျိုးသမီးကောင်းများအနေဖြင့် ဗုဒ္ဓဘာသာဝင်ကောင်းတစ်ယောက်ဖြစ်ရန် ဘုရား၊ တရား၊ သံဃာအကြောင်းအရာနှင့် ကံ၊ ကံ၏ အကျိုးကို ဗုဒ္ဓဘာသာခေတ်လူငယ်များ သိရှိနားလည်စေရန် ခံစားချက်၊ ခံယူချက်အပြည့်နှင့် လေ့လာဆည်းပူးပြီး၊ သာသနာအတွက် အကျင့်စာရိတ္တနှင့် ယဉ်ကျေးမှုမြင့်မား လာစေရန်ထိန်းသိမ်းစောင့်ရှောက်ရပါမည်။ ထိုသို့ယုံကြည်စောင့်ရှောက်မှသာ သရဏဂုံအခြေခိုင်မာသော ဗုဒ္ဓဘာသာ ဝင်ကောင်းတစ်ဦးဖြစ်ပေမည်။
ထို့ကြောင့် မိဘ၊ ဆရာများအနေဖြင့် ကိုယ့်တပည့်၊ သားသမီးများကို တန်ဖိုးရှိစွာ "ဆင်စီးပြီမြင်းရံ "သည့် သားကောင်းရတနာ၊ သမီးကောင်းရတနာများဖြစ်အောင် အဓိကနှင့် သာမညခွဲခြမ်း၍ တစ်ဘက်တစ်လမ်းမှ ဗုဒ္ဓဘာသာ မြန်မာ့ယဉ်ကျေးမှု အနှစ်သာရများကို သင်ကြားပေးစေလိုကြောင်းဖြင့် ဤဆောင်းပါးလေးနှင့် စေတနာရှေ့ထား၍ တိုက်တွန်းနှိုးဆော်လိုက်ပါတယ်။

            *မကဗျာ ပန်းခင်း*(စာပေချစ်သူ)

ဤဆောင်းပါးသည် ကျွန်မ၏ စာပေချစ်သူများအဖွဲ့နှင့်`ပထမဆုံး လူငယ်များ၏ အနာဂတ်ကမ္ဘာ´ စာအုပ်မှာရေးသားထားသော "ဘာသာတရား တန်ဖိုးထားစေချင် "ဆောင်းပါးဖြစ်ပါသည်။

Posted by .ဇော်ရဲ { N.P.T }